總瀏覽量

2012年8月25日 星期六

[領匯商場] 頌安商場 @2012-08-25

(from Yahoo Blog)
2012年8月25日

馬鞍山頌安商場, 1996年落成, 喺2008動過小手術, 做咗資產提升工程, 當時樓齡只有12年。

柴灣有隧巴直到馬鞍山, 雖然車程長, 不過可以沿途睇吓街景, 比起搭港鐵要左轉右轉, 又冇野睇, 依然除笨有精。

今日行程:由柴灣搭隧巴682 (巴士$19; if 搭港鐵$18.6) 先去頌安商場, 喺頌安邨頌和樓落車。巡完頌安之後, 個心十五十六, 去恆安還是耀安好呢? 終歸係去咗恆安。回程喺耀安邨耀謙樓對出有車搭返柴灣, 都係R682, 再盛惠19個大洋。


頌安商場 (地址:西沙路632號), 面積146,400呎, 1996年落成, 樓齡16年

 
落咗車, 向左行, 就會見到頌安商場

商場入口

商場內地方寬闊, 擺咗幾檔展銷檔後, 都仲有大把地方

簡簡單單的天花, 滲進天然光

先巡樓下呢層

人山人海的Cosy Collection (15號舖),「租約期滿清貨大減價」, 某D貨品5蚊件任揀

入到中庭

話就話做過資產提升工程, 睇勻晒係得呢個天花最像樣, 其他地方都唔多覺有D咩, 大部份都係似番房署以前咁樣

中庭位置亦有個商場入口, 行出嚟有個的士站

港鐵特惠站, 嘟一嘟, 由馬鞍山站 or 恆安站入閘, 可以慳番$1 (麥當勞.6號舖對出)。冇蝕底, 我都順手嘟咗, 以備不時之需, 不過後尾都係冇用到, 選擇咗搭巴士

顧客服務台

對正顧客服務台呢條巷直入, 最盡頭係頌安萬有街市

街市內有多檔港式小食店, 競爭不小, 所以價錢都好合理。 另外, 裡面有檔手撕雞 (厚興瑜記.10號檔), 就今日所見, 顧客以年輕couples居多, 唔似街市常客, 睇嚟係上完網之後, 慕名而來, 賣嚟試吓

街市出租率應該接近100%, 唔多覺有吉檔

巡完街市, 上咗一樓。金裝燉奶佬茶餐廳 (113號舖) 裝修得頗搶眼

幾間小店, (左至右) 富霖家政 (115號舖), 全能電器 (116號舖), 十八本時裝 (117號舖)。有冇發覺D人聚晒喺呢條巷嘅盡頭?

小店的吸引力, 結終不及大集團 (稻香超級漁港.118號舖)。全靠稻香帶動人流, 駿豐報檔 (119號舖) 黐住喺側邊, 都撈到D油水。買報紙「 唔要紙巾減5毫」, 足以反映呢個場缺乏競爭

釆欣 (125號舖) 售賣頭飾及健康護足鞋墊, 而且標榜「自設工廠品質保證」, 但係睇落去, 對街坊嘅吸引力, 只屬一般

行過一條巷, 人流量相對弱好多, 領匯仍須加把勁, 引入多D啱附近居民口味的商戶。如果係站喺基金持有人嘅角度, 則反映呢個場嘅營運效率, 仍有大幅進步的空間。(教育家學習中心.131號舖外)

吉舖招租 (123+128號舖)

走廊天花, 個人覺得係前朝留下來的舊模樣, 唔知有冇估錯呢? (AIC工商優惠店.127A號舖外)

早前因為759阿信屋殺入頌安, 而嗌晒救命的小岩井超值市場 (135A號舖), 到今天依然健在

與駿豐報檔同層的7仔 (135號舖), 報紙減5毫加送紙巾, 顯示呢個場有需要再引入同類型商戶, 商戶之間多D競爭, 才能令街坊直接受惠。目標係每份減1蚊, 再加送紙巾

類似冒險樂園物體的黃金樂園 (101號舖)

商場一樓的天花及走廊

就今日觀察, 場內仍保留住多間小店, 但係對商場客的吸引力始終稍遜, 反而搬落樓下街市檔, 才會較接近佢地嘅目標顧客群。唔好以為係「降格」, 其實咁樣至係佢地更佳的出路。雖則一定會有人青筋暴現, 鬧爆領匯逼走小商戶, 但係顧客好現實, 幫唔幫襯由顧客決定, 就算嗰D小店繼續賴喺度, 都唔慌好生意, 窒礙咗商場人流, 反而會成為鄰近幾間舖位嘅負累, 拖低其他商戶嘅生意。講開又講, 有樣野我最怕, 就係D人逢親係小店就話係 "特色小店" 喎, 用吓腦啦, 唔該! 佢地大部份都係向代理批發或者拆家攞貨之嘛, 又冇added value, 我真係唔覺得有乜野特色可言囉!

頌安商場外觀。巡完頌安, 沿住行人天橋, 過去另一個場——恆安商場



領匯官方網頁對頌安商場資產提升工程(AEI)的描述:

頌安商場於2008年第一季完成資產項目提升工程,整個商場變得更為整潔亮麗。主要的翻新工程包括店面擴充、在公用地方增設全新商舖翻新中庭,不單提高可出租面積的效益外,更令商品及服務多元化,並改善購物氣氛及環境。

商場翻新後,可讓自然光直接照入商場的主要流通區域,是改善購物環境的重要元素。全新的中庭設計,更為商場帶來活潑生動、空間廣濶的形象。店面更擴展至本來過於寛濶的走廊,進一步提高可出租面積的效益,以及於原本空置的地方引入更多商舖。



***



沒有留言:

張貼留言