總瀏覽量

2012年4月21日 星期六

[房署商場] 白田商場 @2012-04-21

(from Yahoo Blog)
2012年4月21日

  
好耐冇行過房署舊公屋商場, 知道白田邨要清拆, 都想睇吓沒有「領匯霸權」嘅公屋商場係點樣, 於是由柴灣搭港鐵去石硤尾 


1. 去房署網頁睇過, 話白田商場得2,000平方米, 睇樣又唔似咁細喎。原來上面嗰幾層係停車場

2. D人成日話D野貴, 就一定賴租金貴, 房署D租咁平, 但係又唔覺白田D野特別平喎, 午市快餐$31, 外賣自取加$1 (敘昇餐廳.商舖25號)

3. 三文治餐單拼$19, 雙拼$21, 冇冷氣 (蘭園咖啡奶茶.熟食檔1號)。問心嗰句, 照咁計我情願食麥當勞, $20一個巨無霸餐, 大件夾抵食, 有冷氣嘆, 地方乾淨企理, 仲任坐唔嬲

4. 合興茶樓 (商舖24號), 究竟算係平還是貴, 可以自己比較吓

5. 街市喺三樓, 呢度係電梯大堂

6. 幾經辛苦爭取番嚟嘅港鐵特惠站 (商場3樓, 街市嗰層), 嘟一嘟慳1蚊, 不過唔係咁多人嘟。前面有間文具店, 好犀利架, 有多個牌子嘅電動打字機嘅打字帶賣架 (後生D都未必明我講乜), 我諗嚟諗去, 除咗買嚟收藏, 都諗唔到可以買嚟做乜??

7. 空置街市檔位歡迎投標, 但係要預埋第1,2,3,12座嘅住戶, 出年會搬走晒, 個商場都會過幾年要拆卸重建喎

8. 除咗近出入口嗰幾檔, 街市入面絕大部份檔口都係落晒閘, 如果係領匯街市, 已經俾人鬧到狗血淋頭

9. 街市對出有巴士總站, 小巴站, 的士站, 應該好旺至啱喎

10. 第12座樓下的舖頭。上到嚟白田邨, 感覺到腳步慢了, 人人都慢條斯理, 懶洋洋的, 見到有D人租咗個舖位, 不過都唔知係咪做生意嘅? 入面有人攤喺長凳/梳化, 悠然自得咁歎報紙/睇電視, 過日辰

11. 華園茶餐廳 (12座5號舖), 三文治餐單拼$19, 雙拼$21, 烘底加$1

12. 都係第12座的舖頭仔

13. 第12座樓下公廁

14. 即將清拆的第12座, 加建升降機工程仍舊進行中

15. 左邊係白田商場, 右邊係第3座, 樓高7層, 都係要拆

16. 租房署舖嘅另一好處, 係可以免費擴展幾倍地方做生意 (唔係針對呢間, 而係好多間都係咁)

17. 準備離開白田邨, 再見喇!!

18. 唔知幾時會再嚟, 下次再嚟白田邨時, 應該會唔同晒樣

19. 喺白田邨$21食個三文治餐, 我覺得搵老襯, 於是落番偉智街, 有檔車仔麵睇落幾對版, 幼麵$5+牛腩$7+豬腸$7+蘿白$4, 盛惠$23 (不過肥哥話下星期會調整)。一路食, 一路了解吓行情, 聽到肥哥叫個阿姐暫停電話外賣, 狂呻唔夠人手, 講講吓又借D意晒吓命, 話有兩份雜誌想同佢做訪問, 佢都唔想接, 費事到時更加唔夠人手應付喎...... 如果李卓人之流聽到實開心死, 因為人哥成日掛喺口邊嘅打工仔女, 依家都不知幾搶手。

20. 行行吓, 行咗去重建後的石硤尾邨, 今期有份被清拆嘅白田邨住戶, 將會調遷過嚟

21. 追求更佳生活質素係人嘅天性, 呢幾位街坊已經急不及待, 離遠手指指咁遙距揀樓。我雖然一介草根, 亦都希望屋企附近嘅公屋商場靚靚地, 冇理由住公屋就一定要幫襯D兜踎商場架!? 房署賣甩D舊商場, 依家俾領匯搞得有聲有色, 我覺得好OK喎! 有人話領匯加租, 整到D野貴哂, 我覺好好笑囉! 呢個世界有樣野叫「通貨澎脹」架, 況且, 我又唔見得房署舖頭D野有幾平喎!?

22. 石硤尾商場都好舊, 勝在享有地利

23. 石硤尾街市內

24. 唔知應該叫「保安崗位」還是「顧客服務台」

25. 石硤尾商場正門 (巴域街38號)

26. 石硤尾商場的麵包店

27. 呢間係房署石硤尾商場其中一間餐廳, $25個三文治餐, 我食唔起喎, 我依家至知, 原來深水埗D人咁有米, 消費力咁高架!! (參考標準:柴灣區雙併三文治餐$17已經有交易。) 實在唔抵得, 再要講多次, 乜唔係房署舖頭賣嘅野特別平嘅咩??

- - -


2018-06-25 : 房署圖封白田商場 百人包圍爆衝突5人傷送院 (東方原文)
  

3 則留言:

  1. O2你有冇攪錯,連房署白田都巡埋,香港你應該係無敵架喇 ^^

    回覆刪除
    回覆
    1. 講笑咩,追影族才是商場達人呀 ^^'

      刪除
    2. 各家各做各種業務啦~ 各有特色

      不過追影族的確在「巡視商場」方面較全面啲 👍
      話說佢的blog最近都好似少傾談關於商場

      刪除